Ҡандра ла күлен урай-урай,
Табып ҡына алдым бер ҡурай.
Хаттар ғына һалһаң, һал заказной,
Заказной ҙа хаттар тиҙ урай.

Ҡандракүл буйы туғай-туғай,
Туғайҙары уның йәшләүек.
Беҙ йырламай, дуҫтар, кем йырлаһын,
Нужа ғына күргәс йәштән үк.

Йоморо матур тояғыңды
Дағаларбыҙ, юрғам,
Ҡырас матур ялдарыңды
Уҡаларбыҙ, юрғам.
Өҫтөндәге һылыуыңды
Төшөр инде, юрғам.
Һайт, ҡара юрғам,
Тайт, ҡара юрғам.

Әллиләү генәйем,
Бәллиләү генәйем,
Әсмәбикә тыпыр-тыпыр
Баҫып килә генәйем.
Күҙ теймәһен буйҙарына,
Үҫеп килә генәйем.

Ағиҙелде аша кисмәнем,
Һыуҡайҙарын уның эсмәнем.
Әҙәм балалары шикелле,
Рәхәт көндәр күреп үҫмәнем.
Үҫә-үҫә ҡыҙ бала ҙур була,
Һөйгәненә баралмай, хур була.

Буранғол улы Ҡаһарман
Кантон ине бер заман.
Ҡылысын тағып йөрөйҙөр,
Кантонмын тиеп һаман.

Ҡаһарман кантон ҡытатский,
Ник булдың штатский?
Шәһиҙә һиңә барыр ине,
Булмаһаң штатский!

Ҡолой кантонды ла бай, тиҙәр,
Ҡамсат та бүрке, ай, бар, тиҙәр.
Үҙ хөкөмдәре лә үҙ ҡулында,
Ни ҡылһа ла, ирке бар, тиҙәр.

Ҡолой кантондың да буйҙары
Буйға ғына үҫкән тармалай.
Ил күҙенән ҡанлы йәш ағыҙған —
Ҡолой кантон менән Ермолай.

Урал ғына тауҙың, ай, башында
Урай-урай үҫкән бер ҡурай.
Шул ҡурайҙы алып, бер тартты ниһәң,
Ҡайғы-хәсрәт баҫыла бер талай.

Йүгереп кенә мендем, ай, үҙәндән,
Таҡыя ла ғына башлы ҡурайға.
Ҡая ташҡа баҫып, ҡурай тарттым,
Эштәр китмәҫме тип уңайға.

Өҫтәл дә аҫҡайҙары шул дүртәр ҙә аяҡ,
Өҫтәл дә өҫкәйҙәре шул тулы ла сынаяҡ,
Һай кем, тулы ла сынаяҡ.
Беҙҙең дә былай гөрләшеп ултырғанды шул
Белә лә микән, күрә лә микән,
Ишетә лә микән, тимен мин, күрше тирә-яҡ.
Эсеп тә ебәр ҡымыҙҙың да шул һалҡынын,
Бәлки ҙә баҫылыр йөрәгең шул ялҡыны.

Ҡысҡырмасы, кәкүк, ай, ҡаршымда,
Ҡысҡырһаңсы ағас башында.
Ҡарсығаҡай кеүек моңһоҙ инем,
Ҡайғы-хәсрәт төштө башыма.

Ҡысҡырмасы, кәкүк, ай, һаташып,
Хәсрәт арттырырға маташып.
Сит илдәрҙә йөрөй яңғыҙ башым,
Яңғыҙ кәкүк кеүек аҙашып.

Беҙ һуғышҡа ингәндә,
Бәхилләштек барыбыҙ.
Беҙ һуғыштан сыҡҡанда,
Алдан сыҡты даныбыҙ.
Любезники, любизар,
Маладис, маладис!